АҞӘА, нанҳәа 28 - Sputnik. Аԥснытәи ахәыҷқәа алахәын Москва имҩаԥысыз Жәларбжьаратәи ахәыҷтәы культуратә фестиваль, абри атәы аанацҳауеит Аԥсны акультура аминистрра.
Ареспублика ӡырыргон Емилиа Терзиан-Ҳагба, Амина Аншба, Злата Богненко, Лана Габуниа, Лана Чачибаиа, Каиа Хәыпориа. Урыстәыла аҳҭнықалақь ахь аԥснытәи аҭыԥҳацәа дрыцны дцеит Аԥсны Жәлар рартистка Нинель Бжьаниа.
Афорум аҳәаақәа ирҭагӡаны имҩаԥысуан еиуеиԥшым аусмҩаԥгатәқәа - амузыка, аҿыханҵа, ахореографиатәи атеатртәи ҟазара, акинематограф, анимациа ахырхарҭақәа рыла. Уи иалахәылацәан ҩ-нызқьҩык рҟынӡа аҟыбаҩ злоу 12 ҳәынҭқарра рҟынтәи ақәыԥшцәа: Аԥсны, Беларусь, Аахыҵ Уаԥстәыла, Сербиа, Ҭаџьыкисҭан, Узбекисҭан, Туркменисҭан, ДЖәР, ЛЖәР, Бахреин, Иран, Египет.
Аусмҩаԥгатә апрограмма иалан аҟазаратә-классқәа, алекциақәа, аҟазарҭақәа, астол гьежьқәа, иара убас еицырдыруа акультура аусзуҩцәа рԥыларақәа.