АҞӘА, цәыббра 12 - Sputnik. Урыстәыла ахада Владимир Путини Франциа ахада Еммануель Макрони ҭелла Запорожтәи АФС аҭагылазаашьа иалацәажәеит ҳәа аанацҳауеит Кремль апресс-маҵзура.
"Урыстәылатәи аган азхьаԥшра анаҭеит украинатәи аган иааиԥмырҟьаӡакәа ЗАФС ишеихсуа, арадиоактивтә црыҵқәа рыҵәахырҭагьы абрахь иналаҵаны. Уи ахҟьаԥҟьақәа акыр ашәарҭара рыҵоуп", - аҳәоит адырраҭараҿы.
Владимир Путин франциатәи иколлега изеиҭеиҳәеит урыстәылатәи аган астанциа ахьчараз аҽазышәарақәа шыҟанаҵо, иазгәеиҭеит Киев апровокациақәа ирҟәаҵырц анырра арҭарц шаҭаху.
Иара убасгьы иазгәеиҭеит украинатәи аруаа Донбасс аҭынч уааԥсыра ишрылахысуа мраҭашәаратәи абџьар ала. Ахадацәа уи адагьы иалацәажәеит украинатәи арыц алгареи амлакреи рыпроблема. Ирҳәеит ԥхьаҟагьы арҭ азҵаарақәа ишырзыхынҳәло.
Запорожтәи атомтә фымцастанциа Днепр армарахьтәи аган аҿы игылоуп, Енергодар ааигәара. Ари Европа иреиҳау астанциақәа иреиуоуп. Уаанӡа украинатәи амчрақәа изныкымкәа астанциа иақәкны ихысхьан.
Цәыббрамза алагамҭазы Атомтә фымцамч Жәларбжьаратәи амаҵзура ахаҭарнакцәа Запорожтәи АФС ахь инеит, иагьазгәарҭеит астанциа иамоу аахақәа. Аиҿкаара ааԥхьара ҟанаҵеит аганқәа астанциа акәшамыкәша иҟоу аҵакыра ахьчаратә зона аԥҵаразы еицәажәарц.