АҞӘА, цәыббра 14 – Sputnik, Бадраҟ Аҩӡба. Аԥснытәи абитуриентцәа урыстәылатәи аҵараиурҭақәа рҟны аҵараҵаразы алшара ҿыцқәа рзаԥҵоуп, абри атәы Sputnik иазеиҭалҳәеит Аԥсны иҟоу Россотрудничество ахаҭарнакра аусзуҩ Руслана Гьергьедааԥҳа.
"Ҳара иаҳзаарышьҭит аԥснытәи абитуриентцәа злахәхар алшо аолимпиадақәа реиқәыԥхьаӡа, урҭ ирхысыз ҳабитуриентцәа ԥышәара цҵада урыстәылатәи аҵараиурҭақәа ирҭалар ҟалоит. Ааигәа уи азы ҳсоциалтә ҳақәа рҿы аинформациа аҳарбеит. Аинформациа аҳарбеит х-ҵараиурҭак- Москватәи афизико-техникатә институт, аекономика Иреиҳаӡоу ашкол (жәларбжьаратәи аҿар ролимпиада), ашкол амагистратура (аолимпиада "Глобальные университеты") рганахь ала", - лҳәеит лара.
Гьергьедааԥҳа лажәақәа рыла аолимпиадақәа ирылахәхар ҟалоит 10-11 класс итәоу аҵаҩцәа.
"Хара имгакәа Москватәи афизико-техникатә институт аолимпиада мҩаԥгахоит. Аҭаҩрақәа ирылагоит цәыббра 17 азы. Ирацәаҩуп аҿар аҭел иаҳзасуа, иҳазҵаауа", - лҳәеит Гьергьедааԥҳа.
Аԥснытәи абитуриентцәа урыстәылатәи аҵараиурҭақәа онлаин-режим ала имҩаԥырго "Open Doors" аиԥш иҟоу аолимпиадаақәа ирылахәхар ҟалоит.
"Иара убасгьы имҩаԥысраны иҟоуп аинформатика, астрономиа, астрофизика, абиологиатә, афизикатә олимпиадақәа", - лҳәеит Гьергьедааԥҳа.
Аолимпиадақәа рзи алахәхараз аԥҟарақәеи рзы аинформациа аиура алшоит Россотрудничесво ахаҭарнакра аҭел +7840 223 33 54 ала.