АҞӘА, цәыббра 28 - Sputnik. Аԥсни Белоруссиеи реизыҟазаашьақәа рҿы иҿыцу ахырхарҭа аиуоит иҳәеит атәыла ахада Аслан Бжьаниа Беларуссиа ахада Александр Лукашенкои иареи реиԥылара аихшьаала ҟаҵо. Абри атәы аанацҳауеит аҳәынҭқарра ахада ипресс-маҵзура.
"Беларуссиа ахада Александр Лукашенко Аԥсныҟа иаара афакт иҳанаҳәо рацәоуп - ҳазҭагылоу аамҭазы ҳаизыҟазаашьақәа аҟазшьа ҿыцқәа аархәоит, ҳаимадарақәа еиҳа ирццакны аҿиара иалагоит. Агәыӷра сымоуп шьаҿа-шьаҿа уи ҳшазнеиуа (ахьыԥшымра азхаҵара - аред. азгә.). Ари азҵаара аҭак саԥыҩлар сҭахым, аха ари аҩнду раԥхьатәи ақьырмыт азышьҭаҵоуп. Ари аҩыза афакт аҭыԥ амоуп. Аиԥылара бзианы имҩаԥысит", - иҳәеит Бжьаниа.
Иара иазгәеиҭеит, Александр Лукашенко Аԥсны зыхиақәиҭу, ихьыԥшым ҳәынҭқарран ишьақәгылежьҭеи раԥхьаӡа акәны дшааз. Бжьаниа иҳәеит аиԥылараҟны ишалацәажәаз аекономика иадҳәалаз азҵаарақәа, агәыӷрагь ааирԥшит ахәынҭқарратәбжьаратә еизыҟазаашьақәа аҿиара шаиуо.