АҞӘА, жьҭаара 1 - Sputnik. Урыстәыла хәҭа-хәҭалатәи арратә ҽеизакра аҳәса аҵанакуам ҳәа аҳәамҭа ҟаиҵеит Урыстәыла атәылахьчара аминистр Сергеи Шоигу, абри атәы акьыԥхьуеит РИА Новости.
"Мап. Уи гәҭакыс иҳамаӡамызт аԥхьаҟагьы. Аҳәса аррахь рааԥхьара ҳгәы иҭаӡам", - ҳәа уи азы азҵаара изҭаз ажурналистцәа аҭак риҭеит Шоигу.
Шоигу иара убас иҳәеит аҳәынҭқарратә аккредитациа змоу икоммерциатәым иреиҳау аҵараиурҭақәа рыстудентцәагьы аҽеизакрахь ишнармыԥхьо.
Атәылахьчара аминистр иазгәеиҭеит ҭагалантәи арранаԥхьара абҵара 1 аҟынӡа иахьнахаз зырра зхызгаз рыхынҳәра аҿҳәара ишаԥырхагамхо.
"Аамҭа ҳахьнахаз зыхҟьаз арратә комиссариатқәа рҿы аилыхара ахьыҟоу ауп. Ҳара иаҳҭахым џьара еилагарак ҟалар. Убри азоуп абҵара 1 аҟынӡа ааԥхьара аҿҳәара ҳазнахаз. Адемобилизациа атәы ҳҳәозар - уа аҿҳәара шыҟац иаанхоит, планла ицоит", - иҳәеит иара.
Подмосковье Сергеи Шоигу Москва ахада Сергеи Собианини Москватәи аобласт агубернатор Андреи Воробьеви алархәны игәеиҭеит арратә ҽеизакрахь инаԥхьаз аруаа разыҟаҵашьеи иахьындырхо аҭыԥи. Аминистр хаҭала дахәаԥшны ибеит Аконгресс-цәыргақәҵатә центр "Патриоти" арра-патриоттә ҿар рааӡаразы арҵара-методикатә центр "авангарди" рҿы ԥхьатәараҟынтәи иаарыԥхьаз атәылауааи ахатәгәаԥхаҩцәеи ахьындырхо аҭыԥқәа.