АҞӘА, жьҭаара 13 – Sputnik. Аҟәатәи аолимпиатә ӡҭарчы аус ауӡомызт 33 шықәса, уи аартра гәахәарыла ирыдыркылеит аҳҭнықалақь ауааԥсыра, абри атәы арадио Sputnik аҟны иҳәеит аилахәыра "Аквастрой" ахада Олег Иурченко.
"33 шықәса ақалақь ӡҭарчыда иҟан, уи аартра гәахәарыла ирыдыркылеит, уи еиҳау лҵшәа ыҟаӡам", - иҳәеит иара.
Иурченко иажәақәа рыла, аӡҭарчы ауаа рацәа аҭаауан аусуратә мшқәа рзы. Еиҳарак аҭыԥантәи ауааԥсыра роуп, 60% ахәыҷқәа змаз аҭаацәарақәа.
Аилахәыра "Аквастрой" ахада иҳәеит аӡынра аамҭазы аӡҭарчы аӡы ҭыргаӡом.
"Аиԥш зеиԥшу аӡҭарчқәа рҟны аӡы карҭәаӡом, избан акәзар, уи аҵа иаԥырхагоуп. Есыҽны аҭыӡқәеи аҵеи дрыцқьон, афильтр иахысуан. Афильтрқәеи аӡыҭгагақәеи ҩба ааҳхәеит", - иҳәеит Иурченко.
Иара убас аӡҭарчы аиҳабы иҳәеит 960 нызқь мааҭ ҳәа ишаахәаз арыцқьагага ҷыда. Иара убас аӡсаҩцәа рҽазыҟаҵарақәеи реицлабрақәеи рзы 130 нызқь мааҭ ҳәа ишаахәаз амҩахәасҭақәа.
Аилахәыра "Аквастрой" ахада иҳәеит аӡҭарчы аӡынра аусура алшоит афымцамчхара еизҳар.
Аӡҭарчы аусура еиҭахацыркхоит лаҵарамза анҵәамҭа 2023 шықәсазы.
Аҟәатәи аолимпиатә ӡҭарчы аартын 1980 шықәсазы, Москватәи аолимпиада аламҭалаз. Аԥсны жәлар Рџьынџьтәылатә еибашьраан ахыбра ааха аиуит, уи аахыс еиҭашьақәыргыламкәа иҟан.
Аҟәатәи аӡҭарчы 2007 шықәсазы ақалақь ахадара қьырала ЗҲәА "Аквастройинвест" ианаҭеит. Уи арҽеира-аиҭашьақәыргыларатә усурақәа ирылагеит. Абри аамҭала ажәытә комплекс ықәган, адренажтә трубақәа шьҭаҵан, аӡыҭгагақәеи аӡрыцқьагақәеи ргылан, аҽыкәабарҭақәеи, аҽеилаҳәарҭақәеи, атрибунақәеи шьақәыргылан.
Аӡҭырчы аҵаулара – 2,25 метра, аҭбаара – 20 метра, аура – 50 метра иҟоуп. Иара 120-ҩык акуеит.