АҞӘА, абҵара 4 - Sputnik. Аԥсны ахада Аслан Бжьаниа Аԥсны аҭҵаарадыррақәа ракадемиа 25-шықәса ахыҵра рыдиныҳәалеит аҵарауаа реилазаара ҳәа аанацҳауеит ахада ипресс-маҵзура.
Атәыла ахада иазгәеиеҭит академиа шаԥҵаз иуадаҩыз аибашьра ашьҭахьтәи аамҭазы, аха ареспубликазы аҵак ду аманы ишыԥхьаӡаз.
"Ҳҵарауаа рылшамҭақәа ҳтәылаҿ аиԥш анҭыҵгьы еицазгәарҭахьеит. Шәара шәусура, шәыҭҵаарадырратә рҿиамҭақәа рыла адунеи аҿы ирдыруеит ҳтәыла аҭоурых-культуратә ҭынха аӡбахә, ҳмилаҭ-хақәиҭтәратә қәԥара аҭоурых, ахьыԥшымраз ҳақәԥара аҭоурых", - ҳәа аҳәоит аҳәамҭаҿы.
Бжьаниа иҳәеит иахьа Академиа еиқәшәоу аҭҵаарадырратә еилазаараны ишыҟоу, ишаԥнаҵо иахәҭоу аҭагылазаашьақәа еиуеиԥшым ахырхарҭақәа рҿы аҿар русуразы. Ахада аҵарауаа ирзеиӷьеишьеит ақәҿиарақәа, Аԥсны ахьӡала рнапы злаку аус аҿы аизҳарақәа.