АҞӘА, абҵара 24 – Sputnik. Аԥсны адәныҟатәи аусқәа рминистр Инал Арӡынба адырраҭара "Умники и умницы" иалахәыз аԥснытәи ашколхәыҷқәа раԥхьаҟа аҵаратә усҳәарҭақәа рҭалараҿ ишрыцхраауа реиҳәеит.
Аолимпиада иалахәыз Лина Аииԥҳа, Никита Чкок, Ҭимыр Қәирнаӡе адгылара рыҭахоит Урыстәыла иҟоу Аԥсны Ацҳаражәҳәарҭа аҟны аус зуа ацентр "Аԥсны аԥеиԥш" аусура аҳәаақәа ирҭагӡаны.
Пицундатәи абжьаратә школ №1 аҵаҩы Лина Аииԥҳа ателеолимпиада "Умницы и умники" аҟны афиналбжахь днеит. Даҽа ҩыџьа аԥснытәи ашколхәыҷқәа: Никита Чкоки Ҭемыр Қәирнаӡеи афинал аԥшьбатәи ахәҭаҿы азҵаарақәа ииашаны рҭак ахьыҟарҵаз азы амедали аордени роуит.