АҞӘА, абҵара 27 - Sputnik. Урыстәыла атәылахьчара аминистрра Украина итҟәаны ирымаз Урыстәыла аруаа жәҩык рыхынҳәра зныԥшуа авидеонҵамҭа акьыԥхьит, аруаа ргәабзиара шьақәыргылатәуп ҳәа иҳәеит дара гәазҭаз аҳақьым.
"Иааидкыланы ргәабзиара ашәарҭара иҭагылам, аха аҽыхәшәтра иахысроуп. Рыԥсы ҭоуп, ахәшәтәырҭақәа рҟны ишьақәгылоит", - иҳәеит аҳақьым.
Урыстәылаҟа ихынҳәыз атҟәаҩы иажәақәа рыла, инапы ԥҵәан, аха ииашамкәа абҩа ахьеиҿартәаз иахҟьаны инапы ихәаӡом. Егьырҭ ихынҳәыз аруаа рыбжьара ахы злоу, абҩаԥҵәа змоу, ирԥҟоз ыҟоуп.
Москвеи Киеви реиҿцәажәарақәа ирлыҵшәаны имҩаԥысуеит аҩганк рыбжьара аҭҟәацәа реиҭныԥсахлара. Убыс, абҵара 24 рзы Украина итҟәаны ирымаз 50-ҩык урыстәылатәи аруаа рхы иақәиҭын, уи аԥхьаҟа 30-ҩык.
Иара убас, абҵарамза алагамҭаз мҽхакы ҭбаала атҟәацәа еимдан. Усҟан Урыстәылаҟа ихынҳәит 107-ҩык асолдаҭцәа.