АҞӘА, ажьырныҳәа 22 – Sputnik. Аԥсны аҵареи абызшәатә политикеи аминистрра сахьала иҩычоу ахәыҷқәа рзы Аконституциа 1500 цыра ашколқәа ирзыршеит.
Иазгәаҭоуп школцыԥхьаӡа ишроуа 10-10 шәҟәы. Ԥыҭрак ашьҭахь иҵегьы иҭрыжьраны иҟоуп.
Ахәыҷқәа рзы Аконституциа ҭнажьит Аԥсны Аконституциатә ӡбарҭа. Ашәҟәы аҭыжьра лаԥшьгамҭоуп Аконституциатә ӡбарҭа аиҳабы Лиудмила Хоџьашьвили.
Ашәҟәаҿы бызшәа мариала иалацәажәоуп аҳәынҭқарра закәу, атәылауаа зинқәаси хақәиҭрақәаси ирымоу, амчра ахырхарҭа хадақәа хԥа реинырра шеиҿкаатәу.
Ашәҟәазы аиллиустрациақәа аԥырҵеит ахәыҷтәы ҟазаратә центри арт-студиеи рҵаҩцәа. Асеиԥш ашәҟәы аҩычара азырхоуп аудиториа хада – ахәыҷқәа аинтерес рызцәыргара. Зынӡа иҭыжьуп ҩ-нызқь цыра.