АҞӘА, жәабран 1 - Sputnik. Аминистрцәа реилазаараҟны Аԥсны аҵакыра ҭыԥқәа рыриаҵәаразы анормативтә актқәеи аԥҟаррақәеи аус рыдуларазы иаԥҵоу аусутә гәыԥ аихшьаалатә еилацәажәара мҩаԥысит. Абри атәы аанацҳауеит Аминистрцәа реилазаара апресс-маҵзура.
Адокументқәа рпроектқәа инарықәыршәаны анхарҭа ҭыԥқәа рыриаҵәара аусхк аҟны азинмч роуеит аҭыԥантәи ахадарақәа.
Атәыла административ-ҵакыратә акқәа зегьы рзы иаку азинтә ҭышәныртәалара аиҿкаара мҩаԥгалахоит Аминистрцәа реилазаара ишьақәнарӷәӷәо аԥҟарала.
Адокумент иҳәаақәнаҵоит анхарҭа ҭыԥқәа рҵакырақәа рыриаҵәара, аиҭаҳатәқәа рыхьчареи нап рыдкылареи, араионтә хадарақәа рзинмч, иҷыдоу анаплакқәа руалԥшьақәа, ахатәхаҿқәеи аиурист хаҿқәеи рҭакԥхықәрақәа.
Аминистрцәа реилазаараҟны Аԥсны аҵакыра ҭыԥқәа рыриаҵәаразы анормативтә актқәеи аԥҟаррақәеи аус рыдуларазы аусутә гәыԥ аԥҵан 2022 шықәса ԥхынҷкәынмзазы. Иара напхгара аиҭоит Аминистрцәа реилазаара Аппарат анапхгаҩы Давид Сангәлиа.