АҞӘА, хәажәкыра 16 – Sputnik. Аԥсны Аџьынџьтәылатә еибашьраан Марттәи ажәылараҿы иҭахаз аԥсуа еибашьцәа ргәаладыршәеит Аҟәа, хәажәкыра 16 рзы, Ахьӡ-аԥша абаҳчаҿы абаҟа амҵан ашәҭшьыҵәрақәа шьҭарҵеит.
Агәалашәаратә усмҩаԥгатә иалахәын Аминистрцәа реилазаара алахәылацәа, Ахада Иусбарҭа ахаҭарнакцәа, аибашьра аветеранцәа, иҭахаз аҵеицәа рыуацәеи рҭынхацәеи, ауаажәларра рхаҭарнакцәа, Аԥсны иҟоу Урыстәыла ацҳаражәҳәаҩ, Аԥсны иҟоу Россотрудничество Ахаҭарнакра анапхгаҩы.
Март 15 - 16 рзы Аԥсны Арбџьармчқәа рҽазыршәеит ақырҭуа ар рҟынтәи аҳҭнықалақь ахақәиҭтәра. Аоперациа адҵаҟаҵаҩыс даман аинрал Сергеи Дбар.
Асааҭ 0:45 азы аԥсуа ар аӷа ихыбрақәа авиациа-артиллериатә мчрақәа ргәыдырҵеит. Урҭ ирышьҭанеиуан аршьаҟауаа.
Аханатә ажәылара қәҿиарала иалагеит, аха нас ақырҭқәа рымчқәа еидыркылеит. Ҳаибашьцәа хаха-хымш рышьҭахь ахымца иаҵагыланы ахьаҵра иалагар акәхеит. Аоперациа амҩаԥгараан иҭахеит 222-ҩы, 23-ҩык хабарда ибжьаӡит.