АҞӘА, хәажәкыра 23 - Sputnik, Бадраҟ Аҩӡба. Аԥсадгьыл ахь ахынҳәразы Аԥсны аҳәынҭқарратә еилакы аԥҵоуижьҭеи 30 шықәса ахыҵра иазкны аныҳәатә хәылԥазы мҩаԥган аԥсуа драматә театр аҟны.
Аслан Бжьаниа Аҳәынҭқомитет аусзуҩцәа рахь иҟаиҵаз адныҳәалара даԥхьеит Атәыла ахады иусбарҭа аиҳабы Џьансыхә Нанба.
"Ҳара иаҳҭахуп атәым ҳәынҭқаррақәа рҟны инхо ҳашьцәа ирдырузарац, Аԥсны - даргьы ҳаргьы иаҳзеиԥшу аҩны шаку, рҭоурыхтә ԥсадгьыл ахь рыхынҳәра еснагь ҳшазԥшу. Ҳамчқәа еилаҵаны, ҳажәҩахырқәа еибыҭаны, ҳарҭ иҳалшоит иӷәӷәоу, еизҳа-зыӷьо аҳәынҭқарра аргылара", - ҳәа аҳәоит атәыла ахада иҟаиҵаз адныҳәалараҟны.
Аҳәынҭқарратә усбарҭақәеи Ҭырқәтәыла, Иорданиа, Ливан, Нхыҵ Кавказ рҟынтәи иааз асасцәеи иҟарҵаз адныҳәаларақәа рышьҭахь, Аҳәынҭқарратә ахортә копелла инанагӡеит амҳаџьыраа рашәа "Шьышь-нани". Анаҩс ахәылԥаз иацырҵеит Аԥсны аестрада ашәаҳәаҩцәеи акәашаратә коллективқәеи.
Аԥсадгьыл ахь ахынҳәразы Аԥсны аҳәынҭқарратә еилакы аиубилеи ҩымш имҩаԥысуан. Хәажәкыра 22 рзы имҩаԥысит аҭҵаарадырра-практикатә конференциа. Уаҟа ирзааҭгылеит аԥсуа диаспора рҭоурыхтә џьынџь ахь рыхынҳәра, Аԥсни аҳәаанырцә инхо амҳаџьырқәа рхылҵшьҭрақәеи реимадара арӷәӷәара, арҭ атәылақәа рахь аҭҵаарадырратә експедициақәа рымҩаԥгара.
Хәажәкыра 23 рзы Аԥсадгьыл ахь ахынҳәразы Аԥсны аҳәынҭқарратә еилакы аусзуҩцәеи Ҭырқәтәыла, Иорданиа, Ливан, Нхыҵ Кавказ рҟынтәи иааз асасцәеи ашәҭ шьыҵәрақәа шьҭарҵеит Аԥсны раԥхьатәи ахада Владислав Арӡынба анышә дахьамадоу Амемориал аҟныи, Аџьынџьтәылатә еибашьраан иҭахаз аибашьцәа рыхьӡала Ахьӡ-аԥша апарк аҟны иҟоу абаҟа амҵани, иара убас Кавказ аибашьра иалаӡыз рыхьӡала Аԥшаҳәаҟны игылоу абаҟа амҵани.
Аԥсни аҳәаанырцә иҟоу ҳџьынџьуааи реизыҟазаашьақәа рырӷәӷәаразы хәажәкыра 23 1993 шықәсазы иаԥҵан Аԥсадгьыл ахь ахынҳәразы Аԥсны аҳәынҭқарратә еилакы.