ГӘДОУҬА, лаҵара 2 – Sputnik, Бадри Есиава. Гәдоуҭа араион ашколқәа рыклассқәаки ахәыҷбаҳчақәа рҟны гәыԥқәаки аркуп аскарлатиназы ҳәа еиҭалҳәеит есымчыбжьатәи аилацәажәараҟны араион асанитартә ҳақьым хада Инга Ҷанԥҳа.
Лара илҳәеит, аҵаратә процесс аамҭала ишаанкылоу Аҷандаратәи ашкол аклассқәак, Гәдоуҭатәи абжьаратә школ №1 аклассқәак рҿы, ахәыҷбаҳчақәа №1, №2, №3, №5 Афон ҿыцтәи ахәыҷбаҳчеи ргәыԥқәак рҟныи.
"Аскарлатина зхьыз ахәыҷы 21 мшы ихы ԥхьеикроуп. Акласс ма агәыԥ аҿы ԥыҭҩык ирыхьзар, бжьымштәи аҿҳәарала иадыркуеит", - ҳәа лҳәеит Ҷанԥҳа.
2023 шықәса ҳҭалазар Гәдоуҭа араион аҿы аскарлатина рыдырбалахьеит 87-ҩык ахәыҷқәа. Мшаԥымзазы 27-ҩык ахәыҷқәа ирыдбалан ачымазара.
Ҷанԥҳа лажәақәа рыла уадаҩраны иҟоуп аекспресс-тестқәа. Араионтә АЕС 40 тест 450-450 мааҭ ҳәа иаахәаны араионтә хәшәырҭа иарҭеит.
Аԥҭекақәа рҿы зықьмааҭ иаԥсоуп. Атест-системақәа разымхара иахҟьаны амедикцәа адиагноз ықәдыргылоит аклиникатә ҟазшьақәа рышьаҭала.
Асанитартә ҳақьым хада лгәаанагарала, иахьатәи ахәыҷқәа риммунитет лаҟәуп, авирусқәа рҿагылара рцәыхьанҭоуп.
Аскарлатина аан ацәеижь аҿы ицәырҵуа атоксинқәа раԥхьа иргыланы аҷаҷақәеи агәи роуп изԥырхагоу.