АҞӘА, лаҵара 3 - Sputnik. Аԥсны ахада Аслан Бжьаниеи Михаил Мишустини Минводы имҩаԥысуа актәи Кавказтәи аинвестициатә цәыргақәҵаҿы еиԥылеит ҳәа аанацҳауеит ахада ипресс-маҵзура.
"Аслан Бжьаниеи Михаил Мишустини аԥеиԥш зауша апроектқәа ирылацәажәеит Аԥсны газла аиқәыршәареи атуризм аусхки рганахь ала", - ҳәа аҳәоит адырраҭараҿы.
Аԥснытәи астенд ангәеиҭоз Урыстәыла аԥыза-министр аҟәатәи аҳаиртә баӷәаза зҿлымҳарыла дазҵааит. Бжьаниа агәыӷра ааирԥшит уи ианаамҭоу урыстәылатәи анапхгара рыцхыраарала аусура ишалаго азы.
Уи адагьы, Мишустин игәалаиршәеит Аԥсны аҭыԥ ԥшӡарақәа - аӡиа Риҵа, Афонтәи аҳаԥы, иҳәеит акыр шааҵуа уа дымнеижьҭеи. Аԥсны ахада уи аҭакс аԥыза-министр дааиԥхьеит ианиҭаху аамҭазы Аԥсныҟа даарц.