АҞӘА, лаҵара 6 –Sputnik. Аԥсны аҭагылазаашьа бзиақәа аԥнаҵароуп урыстәылатәи аинвестициақәа рзы, абри атәы арадио Sputnik аҿы иҳәеит Аԥсны Апарламент абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы Беслан Ҳалуашь.
Иара иажәақәа рыла, ацәыргақәҵаҿы Аԥсны иазкыз аҭӡахьы инеит Урыстәыла аԥыза-министр Михаил Мишустин, уи ихаҭыԥуаҩ Александр Новак, Урыстәыла аекономикатә ҿиара аминистр Максим Решетников.
Аилак ахантәаҩы ишиҳәаз ала, Аҟәатәи аҳаирбаӷәаза аусура аларгара, ареспублика газла аиқәыршәара, ақыҭанхамҩеи арекреациатә лшара уҳәа рызҵаарақәа ирылацәажәон.
Адепутат иажәақәа рыла, иҟоу агеополитикатә ҭагылазаашьаан Урыстәыла аԥара аланагалоит Нхыҵкавказтәи арегионқәа рахь. Аԥсны уи иахьазааигәоу иабзоураны иахәҭоуп ибзиоу аинвестициатә ҭагылазаашьақәа раԥҵара, атәыла аекономикатә ҿиара алыршаразы ҳәа иԥхьаӡоит иара.
"Ҳара ари аҩыза алшара ҳхы иаҳархәароуп, ҳзакәанԥҵара уи иазыҟаҳҵароуп", - иҳәеит Ҳалуашь.
Кавказтәи аинвестициатә цәыргақәҵа иалахәын Урыстәыла арегионқәа зегьы рҟынтәи асасцәа, Нхыҵ-Кавказтәи афедералтә округ асбиектқәа рхадацәа. Аԥснытәи аделегациа напхгара аиҭон ахада Аслан Бжьаниа.