АҞӘА, лаҵара 31 - Sputnik. Аԥсны агәабзиарахьчара аминистр Едуард Быҭәба ақалақьқәеи араионқәеи рыхәшәтәырҭақәа рхадацәа алархәны амедусҳәарҭақәа аԥхынра ишазыхиоу аус далацәажәеит. Абри атәы аанацҳауеит аминистрра апресс-маҵзура.
Излацәажәоз апроблемақәа иреиуоуп акадртә дефицит. Уи аиҳаракгьы ианыԥшуеит акурорттә сезон аан.
"Атуристцәа рхыԥхьаӡара иазҳацыԥхьаӡа амедусзуҩцәа русгьы хьанҭахоит. Иаҳгәалашәоит аинфекционистцәа уахи-ҽни ахәшәтәырҭа ианҭымҵуаз. Аха, уи апроблема урыстәылатәи аҟазауаа рааԥхьарала иаԥаҳхит. Ари апрактика сынтәагьы имҩаԥгатәуп. Уи азы Урыстәыла агәабзиарахьчара аминистр Виктор Фисенко иԥылараан ҳаилацәажәеит", - иҳәеит аминистр.
Едуард Быҭәба иҳәеит аԥснытәи амедусзуҩцәа рҟазара ацҵаразы Сеченов ихьӡ зху амедуниверситет ахь рышьҭра шазыԥхьагәаҭо, аусбарҭа хада анапы ианиҵеит ари амедусҳәарҭахь ОМС азы аиқәшаҳаҭра иаҵанакуа апациентцәа рышьҭрагьы еиҿыркааларц.