АҞӘА, рашәара 8 - Sputnik, Асмаҭ Ҵәыџьԥҳа. Аԥсны Жәлар Реизара актәи аԥхьараан Аҳазалхратә закәанеидкыла аусура иаланаргеит .
Аԥсны ахада Апарламент аҿы ихаҭарнак Анри Барцыц иажәақәа рыла, азакәанеидкыла апроект аиқәыршәараан урыстәылатәи рколлегацәа ирыдҵаалеит аҩтәылак рзакәанԥҵарақәа реинрааларазы апрограмма аҳәаақәа ирҭагӡаны. Адокумент Аԥсны аиҳабыра азыразхахьеит.
Аԥсны Аҳазалхратә еилакы ахантәаҩы ихаҭыԥуаҩ Алиас Лабахәуа иазгәеиҭеит ари азакәанеидкыла аҟәшақәа 10, ахқәа 65, ахәҭаҷқәа 488 шагәылоу. Уи иҳәаақәнаҵоит аҳәаа атауар ахыгареи, адекларациа азуреи, еиуеиԥшым аҳазалхратә операциақәа рымҩаԥгареи аԥҟарақәа.
Ари азакәанеидкыла Аԥсны ҳаамҭазтәи аҭоурых аҿы раԥхьаӡа еиқәыршәоуп, уаанӡатәи 1990 шықәсқәа рзы иаԥҵан.