АҞӘА, рашәара 12 - Sputnik. Урыстәыла амш азгәарҭеит акультура-усутә ҭыԥ "Гәыма" аҟны, аныҳәа еиҿнакааит Аԥсны иҟоу Аурыс тәылауаа реиҿкааратә хеидкыла.
Аныҳәатә концерт еиуеиԥшым ауснагӡатәқәа рыла ишьақәгылан, уи иалахәын 12 коллектив, урҭ рхыԥхьаӡараҟны иҟан Абыжьбатәи арратә база оркестр, афолк-театр "Казачий спас", ацәыргақәҵа "Многоликая Россия", анапҟазацәа рцәыргақәҵа-џьармыкьа.
"Урыстәыла амш аҽны ҳџьынџьуааи ҳареи, Урыстәыла иадҳәалоуи, аурыс дунеи зҽадызкылои зегьы реиқәшәара иамшны иҟалароуп", - иҳәеит Аурыс тәылауаа реиҿкааратә хеидкыла ахантәаҩы Олег Иурченко.
Аџьармыкьаҟны ицәырган hand-made лыхқәа- ачысмаҭәа, аҩычагақәа, адекор, аҿырхиага, ахәмаргақәа, амҿлых, акәацлых, аџьынџьыхәа.
Татиана Кулешова Урыстәылантәи Аԥсныҟа нхара ҳәа дааит хәышықәса раԥхьа. Лара Гәдоуҭа дынхоит, аџьармыкьаҟны ицәырылгеит анышәаԥшьи амҿи ирылхыз ахәмаргақәа.
Иара убас аџьармыкьа далахәын Ераст Астахов. Иара амҿы иалхәу арлашагақәа ҟаиҵоит, Аҟәа имоуп ихатәы ҟазарҭа.
"Аматериали афурнитуреи рзы ауадаҩрақәа сызцәырҵлоит, избан акәзар, Урыстәылантәи ауп ишаазго. Араҟа аҵлақәа ԥысҟаӡом", - иҳәеит иара.
Урыстәыла амш иазкны "Гәыма" имҩаԥгаз ахәылԥыз хыркәшан урыстәылатәи арежиссиор Алықьса Нужни исахьаркыратә фильм "Огонь" адырбарала.