АҞӘА, рашәара 13 - Sputnik. Аҟәатәи ақалақьтә усӡбарҭа иазханаҵеит Ҳаџьараҭ Џьопуа гәҭакрыла Аҟәа инхоз Раиса Оганиан дшишьыз азы. Абри атәы аанацҳауеит Аԥсны Апрокуратура хада апресс-маҵзура.
Џьопуа жә-шықәса арежим ӷәӷәа аколониаҿы ҭакрала ахгара иқәҵоуп. Иара ихара азхеимҵеит.
Ауаҩшьра ҟалеит цәыббра 20 2022 шықәсазы. Аусеилыргара ишазгәанаҭо ала, Ҳаџьараҭ Џьопуа 80 шықәса зхыҵуаз Оганиан лбаҳча анирыцқьоз ашәырҵлақәа ҩ-шьапык хиҵәеит.
Убри иахыркьаны аимак-аиҿак роуит. Оганиан лыҩныҟа дандәықәла Џьопуа абаҳчаҿ иԥыхьашәаз алаба шьҭыхны аԥшәма длышьҭалеит. Ишазгәаҭоу ала, лабала изныкымкәан длысит. Иҟаҵаз аекспертиза алкаақәа рыла, аԥхәыс бырг лыԥсҭазаара далҵит иԥҵәаз лвакьыци лыцламҳәеи ирыхҟьаны ашьа рацәа лыцәцара иахҟьаны.