АҞӘА, рашәара 18 - Sputnik, Сариа Кәарцхьиаԥҳа. "Аԥсныавтомҩа" Лакоба имҩаҟны Дбари Абазақәеи рымҩақәа рыбжьара арҽеиратә усурақәа мҩаԥнагоит, абри атәы Sputnik акорреспондент изеиҭеиҳәеит "Аԥсныавтомҩа" адиректор хада Витали Ҵәыџьба.
Аҳҭнықалақь ахадара аханатә аҭыжаарақәа раԥыхразы аусурақәа рымҩаԥгара ргәы иҭан, аха амҩа 60% аԥхасҭа ахьамоу аҟынтә акаҭран ақәҵара иалагеит.
Лакоба имҩаҟны акаҭран ықәҵоуп 5 000 м² ԥшьыркцаҟны, иара убас ҭыԥқәак рҟны аҭыжаарақәа ҭырҭәаахоит", - иҳәеит Ҵәыџьба.
Аусурақәа хыркәшахоит иааиуа амчыбжь азы. Аусурақәа ирықәхарџьхоит - 7 млн. 131 н.мааҭ. Аԥара азоужьуп Амҩатә фонд аҟынтә.