ГӘДОУҬА, рашәара 19 - Sputnik, Бадри Есиава. Гәдоуҭа араион апрокуратура агәаҭарақәа мҩаԥнагоит аӡиа Еӷьа иалаҳаз ԥшьышықәса зхыҵуаз ахәыҷы иус азы, абри атәы араион ахадара аилатәараҟны иҳәеит апрокурор Едуард Шамба.
"Беларуснтәи иааз аҭаацәа - ани аби, ҩыџьа рхәыҷқәа рыманы Еӷьатәи аӡхыҽҽа иаҭааит. Аганаҿы ақыдуаха иалхны аӡы арсырҭа ыҟоуп, убра ахәыҷы ифотосахьа ҭырхырц дахьықәдаргылаз далҟьан аӡы далаҳаит. Иаӷьны илеиуаз аӡы ахәыҷы дагеит. Ан иаразнак ахәыҷы иеиқәырхара лҽазылшәеит, аха илыҵшәадахеит. Ларгьы цәгьала аӡы дамырхит", - иҳәеит иара.
Шамба иазгәеиҭеит, ари аӡы арырҭа иахәҭоу ашәарҭадара анормақәа ишрықәымшәо, Гәдоуҭатәи араионтә прокуратура иҟалаз ахҭыс азы агәаҭарақәа шымҩаԥнаго.
Иара убасгьы иҳәеит, рашәарамза алагамҭазы амилаҭ парк аҟны амашәыр шыҟалаз, Ҩыԥсара аиҩхааҿ илеиз ахаҳә ахаҵа иаахан дышԥсыз, аԥҳәыс лшьапы ԥҵәаны ахәшәтәырҭахь дышнагаз. Арҭ урыстәылантәи иааз туристцәан, дара зықәтәаз амашьына ацаҟьа иаҵадыргылеит.
Апрокурор иҳәеит, Ҩыԥсаратәи аиҩхааҿ иахьшәарҭоу аҭыԥқәа рыҟны амашьынақәа раанҿасра аԥырҟәҟәаразы аӡбамҭа рыдыркылар ҟалар шалшо.