АҞӘА, рашәара 25 - Sputnik, Сариа Кәарацхьелиаԥҳа. Аҽырҩра аамҭа аатит Пицундатәи аҽырхәмарратә комплекс аҟны амҽыша, рашәара 25 рзы.
Аицлабрақәа рыӡбаҩ хада Џьарназ Бениа иажәақәа рыла зынӡа ԥшь-еиԥхныҩларак ракәын иҟаз.
"Ахьӡ-аԥша" ахԥатәи аҩаӡара занашьоу Џьамал Гәбаз ихьӡала аҭыԥантәи аҽқәа 1400 метра рыҩраҟны актәи аҭыԥ ааникылеит Ҭемыр Чхьебелиа, аҩбатәи - Алхас Абыџба, ахԥатәи - Владес Ҵнариа.
СССР Зҽаԥсазтәыз аспорт азҟаза, Леон иорден занашьоу Саида Гәынба лыхьӡ ала 1600 метра еицлабуаз рыбжьара "ахьы" даԥсахеит Ҭемыр Чхьебелиа, "араӡны" игеит Дмитри Қардиа, "аџьаз" - Џьубеи Аҩӡба.
"Аԥсны Афырхаҵа" Валери Шәлымба игәаларшәаразы 2000 метра аҭыԥантәи ашьацқьа злоу аҽқәа реиԥхныҩлараҿ актәи аҭыԥ ааникылеит аҿыбӷаҟазаҩ Адам Шегушев, аҩбатәи - Џьубеи Аҩӡба, ахԥатәи - Саид Гәынба.
Аԥсни Урыстәылеи Зҽаԥсазтәыз аспорт азҟаза, "Ахьӡ-аԥша" аҩбатәи аҩаӡара занашьоу, адунеии Европеи акырынтә иачемпионхахьоу, Аолимпиатә хәмаррақәа рыҟны ахԥатәи аҭыԥ аанызкылаз, Аԥсны аспорт еиқәԥаразы Афедерациа ахантәаҩы Денис Царгәыш иаԥхьахә агаразы 2000 метра еиԥхныҩлоз ашьацқьа злоу аҽқәа рыбжьара актәи аҭыԥ ааникылеит Адам Шегушев, аҩбатәи - Џьубеи Аҩӡба, ахԥатәи - Дмитри Қардиа.
Аҽырҩра аамҭа аартраҿы аицлабрақәа раԥхьахәтә фонд 350 нызқьмааҭ ыҟан.
2023 шықәсазы аҽырҩра аамҭа иалагӡаны нанҳәамза анҵәамҭаз иазгәаҭоуп "Аԥсны ахада Ихраҿа" агаразы аҽырҩра, жьҭаарамзазы - Леон иорден занашьоу Павел Арӡынба игәалашәаразы аицлабра, абҵарамзазы - Аԥсны ачемптонат, жьҭаарамза анҵәамҭазы Мықә имҩаԥгахоит Аԥсны аџьынџьтәылатә еибашьраҟны игаз Аиааира 30 шықәса ахыҵра иазкны, аҽыхәмаррақәа рзы Очамчыра араион ачемпионат.