АҞӘА, рашәара 30 – Sputnik. Ақыҭанхамҩа аминистрра Аминистрцәа реилазаара иаднагалеит 2024 шықәсазы ақыҭанхамҩатә программа аԥаразоужьра 100 проценткны иацнаҵарц, абри атәы арадио Sputnik аҟны иҳәеит аусбарҭа аиҳабы, аԥыза-министр актәи ихаҭыԥуаҩ Беслан Џьопуа.
Иара иажәақәа рыла, аҳәаанырцәынтә иаарго ашәыри ауҭраҭыхи реиҵатәразы аҭыԥантәи анхамҩақәеи анаплакқәеи рԥаразоужьра иацҵатәуп.
"100 миллионк – ари аҿиаразы ихәарҭаӡам, ари анхацәеи урҭ рынхашәеи цхырааран ауп ишрызхо. Ақыҭанхамҩа аҿиара иаҭахуп амиллиардқәа. Ус шакәугьы ҳаалыҵ, шьаҿа-шьаҿала акәзаргьы аимпорттә аалыҵ аџьармыкьаҟынтә агәҭасра атенденциа иазнеиуеит", - иҳәеит иара.
Џьопуа иазгәеиҭеит аминистрра акомиссиа 2023 шықәсазы 123 проект шаднакылаз. Аԥара азоурыжьаанӡа акомиссиа алахәылацәа хаҭала аҭыԥ аҿы инеины аҭагылазаашьа ҭырҵаауеит. Зегьы ишахәҭоу аиԥш иҟазар, азыҳәа ҟазҵаз ибизнес арҿиаразы ирҭоит аиҭаҳатәқәа, амыругақәа, аргылара маҭәахәқәа.