АҞӘА, ԥхынгәы 4 – Sputnik, Сариа Кәарцхьиаԥҳа. Гәылрыԥшь араион аҿы иҟоу астанциа маҷ "Дранда" Аинвестпрограмма иаларҵар ҟалоит.
Урыстәыла Аекономикатә ҿиара аминистр Максим Решетников Аԥсны дахьынӡаҟоу абри аус далацәажәеит.
Решетников иажәақәа рыла, азҵаара Аенергетика аминистррахь ицәыргатәуп.
Астанциа маҷқәа "Дранда", "Агәыӡера" Аҟәатәи аҳаирбаӷәазеи Кациқыҭ идыргыло ацрыҵкьакьақәа рполигони лашарала еиқәдыршәоит. Аҳаирбаӷәаза ареконструкциаз иаҭаххоит 4 мегаваттк. Аха уи цәшәарада уахь анашьҭра алшоит астанциа маҷ ареконструкциеи афымцацәаҳәақәа рымҩангареи рышьҭахь.
Ишьақәырӷәӷәоу 2023-2025 шықәсқәа рызтәи Аинвестпрограммаҟны арҭ аобиектқәа арбаӡам. Бжьаратәла афымцацәаҳәақәа реиҭарҿыцреи рымҩангареи 500 миллион мааҭ рҭахуп.