АҞӘА, ԥхынгәы 4 - Sputnik, Сариа Кәарцхьиаԥҳа. Урыстәыла Аекономикатә ҿиара аминистр Максим Решетников Аԥсны иҟазаараан даҭааны ибеит Аинвестпрограммала Гәылрыԥшь араион Кациқыҭ идыргыло ацрыҵ кьакьақәа рполигон.
Ари Аԥсны ираԥхьатәиу гәамсамкаԥсарҭатә полигонуп. Аԥсны акапиталтә ргылара аусбарҭа аиҳабы Ҭемыр Агрба иажәақәа рыла, аобиект ахышәаҵышәа 36 гектар иҟоуп. Ара иаздырхиахьеит ажра, ишьақәдыргылахьеит аилыршәшәаратә цәаҳәа.
Кациқыҭ агәамсамеизгарҭа аполигон
© Sputnik / Томас Тхайцук
"Аинвестпрограмма ҿыц аҳәаақәа ирҭагӡаны иазԥхьагәаҭоуп арыцқьагатә ргыларақәа, амыругақәа. Урҭ аҿаҳҵахьеит. Аӡыцрыҵқәа зегьы арыцқьагатә ргыларақәа ирҭыслоит", - иҳәеит Агрба, иагьазгәеиҭеит уахь уназго амҩа аремонт шазырухьоу.
Акапиталтә ргылара аусбарҭа анапхгаҩы иажәақәа рыла, Кациқыҭтәи аобиект дотациатәуп.
Максим Решетников иазгәеиҭеит атуристтә обиектқәа ари амаҵзура ахәԥса ршәалар шакәу.
Решетников Гәылрыԥшь араион аҿтәи аполигон аҿы аусурақәа шымҩаԥысуа гәеиҭеит
© Sputnik / Томас Тхайцук
Кациқыҭтәи аполигон аргылара иалагеит 2021 шықәса ажьырныҳәамзазы. Уа аиларшәшәаратә цәаҳәа дыргылахьеит. Ацәаҳәа апроекттә лшамҭа - шықәсык аҩнуҵҟала 50 000 тонна азгәанаҭоит. Аобиект ахархәарахь ианрыҭахалак ашьҭахь арахь иааргалоит Аҟәеи Гәылрыԥшь араиони рҟынтәи агәамсам.