АҞӘА, ԥхынгәы 13 – Sputnik, Асмаҭ Ҵәыџьԥҳа. Зылшарақәа ԥку ахәыҷқәа рзы аҿыханҵаз аҟазара-класс мҩаԥысит Аҟәа, ԥхынгәы 13 рзы.
Иара мҩаԥылгеит асахьаҭыхыҩ-аҿыханҵаҩ Екатерина Зарникова, лара доушьҭымҭоуп Чачба ихьӡ зху Аҟәатәи асахьаҭыхратә ҵараиурҭа. Лара лажәақәа рыла ауснагӡатә мҩаԥган ахәыҷқәа рылшарақәа реилкааразы.
"Арт-терапиа иҷыдоу ахәыҷқәа рзы акраҵанакуеит, ицхыраагӡоуп", - ҳәа лҳәеит лара.
"Ашана" аволонтиор Анисиа Бжьаниаԥҳа ишылҳәо ала арт-терапиа ҟазарыла ахәшәтәра иазырхоуп.
"Ахәыҷы иныруа ақьаад аҿы иҭихуеит. Арт-терапиеи аҿыханҵеи хәарҭас изоуа рацәаҩуп. Ахәыҷқәа еиҳа рхы агәра рго иалагоит, ирҵоит аусеицушьа, аицәыԥхашьара иаҟәыҵуеит", - ҳәа лҳәеит лара.
"Ашанеи" "Кьарази" хылаԥшра зырҭо ахәыҷқәа рзы аҟазара-класс еиҿкаан. Уи иалахәын 12-ҩык ахәыҷқәа.