АҞӘА, ԥхынгәы 14- Sputnik, Сариа Кәарацхьиаԥҳа. Аԥсны ахада Аслан Бжьаниа Кациқыҭ ақыҭан абзазаратә црыҵ кьакьақәа реизакырҭаҿы аусурақәа шцо даҭаан игәеиҭеит.
Имҩаԥгоу аусурақәа ртәы атәыла ахада изеиҭеиҳәеит Аԥсны акапиталтә ргылара Аусбарҭа аиҳабы Ҭемыр Агрба. Аизакырҭа аҵакыраҿы хәышықәса ахархәара зылшо аҭыжаа ҟаҵоуп, ишьақәыргылоуп аилыхырҭатә цәаҳәа, аанда акәыршоуп.
Аилыхырҭатә цәаҳәаҿы аусуҩцәа напыла ақьаад, апластик, аметалл ахьеихыршаша 12 ҭыԥ амоуп. Анаҩс агәамсам амхалдыз змоу алентахь ииаргоит. Амхалдыз аметалл ҳәа акрынхазар, иааннакылоит. Еилыху агәамсам ахархәара зуҭаша аҩбатәи аӡа ҳәа иушьар ҟалоит ҳәа иҳәеит Агрба.
Ара ирыгәҭакуп арыцқьаратә ргыламҭақәа рыргылара.
Агрба иҳәеит иахьазы иқәыргылоу амаҭәахәқәа зегьы Белоруссиа ишҭыжьу, аҭыԥантәи аусуҩцәа иаҭаххар арҽеиратә усурақәа мҩаԥыргартә ишддырҵо. Зынӡа анаплакы аҿы аус рулоит 25-ҩык –амашьынарныҟәцаҩцәа, аоператорцәа, анапхгаҩцәа.
Иара убасгьы аҟьамсаркаԥсарҭа еиԥҟьарада аус ауларц иқәыргылоуп адизельтә генератор, 2,5 -3 мза рышьҭахь арыцқьагатә ргыламҭақәагьы рышьақәыргылара хыркәшахоит иҳәеит Агрба.
Аргылара иазоужьуп 136 миллион мааҭ. Аусура аларгара азгәаҭоуп сынтәа, нанҳәамзазы.