АҞӘА, ԥхынгәы 14 - Sputnik. Сынтәа Гәылрыԥшь араион аҟны 800 гектар адгьыл рцәаӷәеит ҳәа иҳәеит араион ахадара ақыҭанхамҩа аусбарҭа аиҳабы Рафик Григориан.
Ицәаӷәоу аҟынтәи 600 гектар аџьықәреи ларҵоит, 150 гектар рҿы - ауҭраҭых, 20 гектар рҿы - акартош, 20 гектар - амҟәыбыртәқәа, 10 гектарк рҿы – аҟәыд, ацыца, аҟаб.
Араион ахадара абиуџьет аҟынтә 86 гектар адгьыл ацәаӷәара ахә ахыршәааит – Аԥсны жәлар Рџьынџьтәылатә еибашьра аан иҭахаз рҭаацәеи аинвалидцәеи рзы.
Григориан аижәақәа рыла, араион аҿы аԥыжәара аанызкыло ацитрус шәырқәа 1 127 гектар ыҟоуп, 233 гектар аҳәынҭқарра қьырала иамхуп. Уи адагьы 893 гектар ахатә сектор аҿы иазҳауеит. 2022 шықәсазы ацитрусқәа рҽаҩра 22 нызқь тонна инаӡеит.
Иара убасгьы ара ирааӡоит ахәырмаа, афеихоа, алаҳа, 250 гектар ажь, 197 гектар ачаи. Иаадрыхуеит абаҳчаҵыҵындра. Иахьазы 50 гектар адгьыл аҵанакуеит.
Убри аан Григориан иазгәеиҭеит, ақыҭанхамҩа аалыҵ аус ахьадыруылаша азауадқәа шыҟам. Иаҳҳәап 1992-1993 шықәсазтәи аибашьра ҟаланӡа аус зуаз Драндатәи аконсервзауад ма Драндатәи ачаифабрика реиԥш.
2023 шықәсазы Ақыҭанхамҩа аминистрра 18 проект ҿыц ирзыршәеит 7,9 миллион мааҭ аусхк арҿиаразы.
Аԥсны ахада Аслан Бжьаниа иҳәеит, ари аусхк ишадԥхьалатәу аинвестициақәа. Убри аан иазгәеиеҭит асовет аамҭақәа раан аалыҵ акыр ишеиҳаз, аха усҟан ара ишынхоз 55 000-ҩык ауааԥсыра (иахьа – 18 000-ҩык). Ус шакәугьы араион арбагақәа шыҳараку.