АҞӘА, ԥхынгәы 15 – Sputnik. Ҿыц иаԥҵоу аиҿкаара "Аԥсны 1992-1993 шықәсқәа рзтәи Аџьынџьтәылатә еибашьра аветеранцәа рхәыҷқәа" аӡыргара мҩаԥысит Аҟәа ахәаша, ԥхынгәы 14 рзы.
Аиҿкаара ахантәаҩы Адица Цәышԥҳа лажәақәа рыла, ас еиԥш ахшыҩҵак лызцәырҵит аветеранцәа, рҭаацәарақәа рҿы есҽны ицәырҵуа азҵаарақәа ӡбашьаз ирымоу азы данрацәажәа ашьҭахь.
"Аҳәынҭқарратә усбарҭакәеи аҭаацәеи рыбжьара абжьацәажәараз ацхырааҩ хымԥада даҭахны ианысыԥхьаӡа схаҿы иааит абас еиԥш аиҿкаара аԥҵара. Аибашьра аветеранцәеи аветеранцәа рыхшаареи ари ахшыҩҵак адгылара арҭеит", - ҳәа лҳәеит лара.
Аиҿкаара "Аԥсны 1992-1993 шықәсқәа рзтәи Аџьынџьтәылатә еибашьра аветеранцәа рхәыҷқәа" политикатә мчык иамадам ҳәа азгәалҭеит Цәышԥҳа.
Аофицалла аиҿкаара ашәҟәы иҭагалан лаҵарамза 2023 шықәсазы, уажәшьҭа "ҳус нап аҳаркит" ҳәа лҳәеит Цәышԥҳа.