АҞӘА, ԥхынгәы 19 – Sputnik, Бадри Есиава. Даҽа мчыбжьык ааҟара аҭаххоит Лӡаа аӡхыҵра ахҟьаԥҟьақәа раԥыхразы иҳәеит ақыҭа ахада Гурам Абӷаџьаа.
"Аусурақәа шцац ицоит. Атехника есыҽны аус ауеит амҩақәеи ауаа рынхарҭақәеи рҿы. Сгәанала, даҽа мчыбжьыкҟа аҭаххоит агәамсам, ахаҳәқәа, икаҳаз аҵлақәа рықәгаразы. Ҳәарада, зехьынџьара атехника знеиуам, аха ауааԥсыра ишалшо ала ҳрыцхраалоит", - ҳәа иҳәеит иара.
Абӷаџьаа иажәақәа рыла, аҭыԥантәи ауааԥсыра рыҩнқәа рашҭақәа дрыцқьоит аӡы иаанагаз алыкь ақәгара иаҿуп, уи аамҭа аҭахуп.
Лӡаа аӡхыҵра ахҟьаԥҟьақәа раԥыхразы гагратәи "Автонхамҩаҷыда" аҟынтәи атехника неит. Алашареи аӡи аӡхыҵра ашьҭахь 4-5 мшы рыҩнуҵҟа ирыҭан. Иара убасгьы Речнаиа амҩа иаԥну аӡиас арсырҭа ҟаҵоуп.
"Ишеилышәкаауа аиԥш, ауаа маҷк ргәы каҳаит. Рмазара, рынхарҭақәа аԥхасҭа роуит. Ара иҟаз атуристцәа реиҳараҩык ықәҵит, аха уи аахыс иаазгьы маҷым. Урҭ ара рыԥсы ршьоит", - иҳәеит Абӷаџьаа.
Ақәаршҩы Гагра араион аԥхасҭа ду анаҭеит, 1100 ҩны аӡы рыҵалеит. Ааха ӷәӷәа аҭоуп Лӡаа ақыҭа.