АҞӘА, нанҳәа 2 – Sputnik. Москватәи аҳәынҭқарратә академиатә акәашаратә театр "Гжель" Аԥснытәи аҳәынҭқарратә филармониаҿ иқәгылоит нанҳәа 22 рзы.
Аконцерт Аԥсны Ахьыԥшымра 15 шықәса ахыҵра аҳаҭыраз имҩаԥгахоит.
""Гжель" атеатр Урыстәыла аҟазара цҳаражәҳәаҩс иқәгылоит. Зыхьӡ ҳараку аколлектив аҳәынҭфилармониаҿы иахьықәгыло гәахәароуп ҳара ҳзы", - иҳәеит Аԥсны акультура аминистр Даур Ақаҩба.
"Гжель" аԥиҵеит еицырдыруа ахореограф, Урыстәыла жәлар рартист, апрофессор Владимир Захаров 1988 шықәсазы, аурыс жәлар рнапҟазара- Гжель 650 шықәса ахыҵра аҳаҭыразы.
1993 шықәсазы атеатр ҳәынҭқарратәхеит, 1999 шықәсазы академиатә театр ҳәа астатус арҭеит.