АҞӘА, нанҳәа 2 – Sputnik. Кандид Ҭарба ихьӡ зху Аҳәынҭқарратә жәлар рыкәашаратә ансамбль "Кавказ-и", Аахыҵ Уаԥстәылатәи аҳәынҭқарратә ансамбль "Симд-и" аконцерт еицымҩаԥыргоит Цхьынвал, нанҳәа 26 рзы.
"Ҳконцертә программа ӷәӷәоуп. Аԥсны мчыбжьык аҩнуҵҟа ҩ-концертк мҩаԥаагоит, уи анаҩсан Цхьынвал ҳақәгылара аҽазыҟаҵарақәа ҳарҿуп. Артистцәа ргәалаҟазаара шьахәуп, агострольқәа ҳарзыԥшуп", - иҳәеит "Кавказ" асахьаркыратә напхгаҩы, Аԥсны зҽаԥсазтәыз артист Омар Ҭарба.
Ҭарба иажәақәа рыла, аконцерттә программа 11 номер рыла ишьақәгылоуп: "Аԥсны аныҳәа", "Исламеи", ауаԥс кәашара "Симд", "Аҟамақәа", "Ашьхарыуаа рыкәашара", "Ауараа рыкәашара", ахореографиатә поема "Аиндаҭлара", "Аҭыԥҳацәа рыкәашара".
Агострольқәа рахь 50-ҩык цоит.