АҞӘА, нанҳәа 4 – Sputnik, Бадраҟ Аҩӡба. Аҟәатәи аҿкчымазаратә хәшәтәырҭа адыррақәа ртәы ааго атәыла асанитартә ҳақьым хада Алла Белиаева фымз рыла аимҳәаршәаа рыдбалан 61-ҩык ҳәа лҳәеит Sputnik аинтервиу аналҭоз.
Алла Белиаева ишазгәалҭаз ала, аимҳәаршәаа аиҳарак асеиԥш иалаҵәеит ҭаацәарақәак рҟны алаҵаҟаҵара мап ахьацәыркуазы, уи инамаданы аколлективтә иммунитет ахьыхҽыз азы.
"Аҟәатәи аҿкчымазаратә хәшәтәырҭа адыррақәа рыла фы-мыз рыла аимҳәаршәаа рыдбалан 61-ҩык, урҭ рахьынтә 56-ҩык ахәыҷқәа роуп, 5-ҩык адуцәа роуп. Ари ачымазара рылаҽуеит ахәыҷқәа реиԥш алаҵа змам аиҳабацәагьы. Адуцәа иахьрыдбалоу иунарбоит аҭагылазаашьа шыуадаҩхахьоу. СССР анеилаҳа ашьҭахь ииз ракәхоит арҭ адуцәа, избанзар СССР аамҭақәа раан алаҵаҟаҵара хымԥадатәын, ухала мап узацәкӡомызт", - ҳәа лҳәеит атәыла асанитартә ҳақьым хада Алла Белиаева.
Иҟоуп аҭаацәа рҿы аиҳабацәа алаҵа аҟаҵара ақәранӡа имнаӡац ахәыҷқәа ианддырхьуагьы ҳәа лҳәеит Алла Белиаева.
"Иҟоуп ахҭыс - зықәрала макьаназ алаҵа ззыҟаҵара ҟамлоз ахәыҷы иҭаацәа аимҳәаршәаа анидырхьыз. Ас ихәыҷқәоу ачымазара хьанҭаны ирхыргоит. Уажәазы алаҵаҟаҵара рацәак иахьақәшаҳаҭым азы аимҳәаршәаа ҳнапы иҵыҵыр алшоит. Иара чымазара ӷәӷәоуп. Ахәыҷы аԥсҭбараҟынӡа днанагаар алшоит. Ҳтәылауаа рахь аҳәара ҟасҵоит рхәыҷқәа хымԥада алаҵақәа рзыҟарҵаларц", - ҳәа лҳәеит Белиаева.
Ишьақәыргылоу аамҭеихшарала аимҳәаршәааҟынтә алаҵа ԥшьынтә иҟаҵатәуп: ахәыҷы ҩымз, хымз, ԥшьымз, 18 мзы анихыҵуа.