АҞӘА, нанҳәа 7 – Sputnik, Бадраҟ Аҩӡба. Ажурналист Саида Жьиԥҳа 1992-1993 шықәсқәа раантәи Аԥсны жәлар Рџьынџьтәылатә еибашьра иазку лышәҟәы ӡырган Sputnik Аԥсны апресс-центр аҿы нанҳәа 7 рзы.
Ашәҟәы аибашьраан ихәыҷқәаз ҩажәижәаҩык ауааԥсыра 1992-1993 шықәсқәа раантәи Аԥсны жәлар Рџьынџьтәылатә еибашьра иазку ргәалашәарақәа рыла ишьақәыргылоуп. Аԥхьаҩ арҭ аҭоурыхқәа идырыр алшоит аԥсшәа, аурысшәа, аҭырқәшәа рыла.
Аиааира 25 шықәса ахыҵраан Саида Жьиԥҳа аибашьра иадҳәалаз лгәалашәарақәа ртәы лҩит. Лусумҭа ажурналисттә еицлабраҿы ахԥатәи аҭыԥ аннакылеит. Анаҩс лара илыӡбеит леиԥш зеиԥшу, аибашьраан ихәыҷқәаз ргәалашәарақәа еидкылан ашәҟәы ҭлыжьырц.
Ашәҟәы "Ихәыз ахәыҷра" Sputnik Аԥсны апресс-центр аҿы аӡыргара
© Sputnik / Томас Тхайцук
"Ауаа рҭоурыхқәа еизганы Аиааира 30 шықәса ахыҵра иазкны ашәҟәы ҭсыжьырц иақәыскит. Аусура уадаҩын, избанзар сыздгылоз зегьы ргәалашәарақәа сыцеиҩыршар рҭахымызт. Шықәсыбжак аҟынӡа ашәҟәы афырхацәа еизызгон. Иҟан зхала зҭоурыхқәа ҭазыҩуазгьы", - ҳәа еиҭалҳәоит лара.
Аҭырқәа бызшәахьы атекст еиҭеигеит Октаи Чкотуа, аурыс бызшәала иҩыз атекстқәа аԥсуа бызшәахьы еиҭаргеит Елеонора Коӷониаԥҳаи Наала Хьециаԥҳаи, аԥсышәала иҩыз атекстқәа аурысшәахь еиҭаргеит Зарина Баснык-Коӷониеи Алина Жьиԥҳаи. Ашәҟәы 246 даҟьа амоуп, атираж – 500 цыра.