АҞӘА, нанҳәа 27 – Sputnik, Бадри Есиава. Авариа ашьҭахь ахәышәтәырҭа иадҵаалаз ааҩык рахьтә хҩык рҭагылазаашьа бааԥсуп, даҽаӡәы - дыбжьаратәуп. Абри атәы Sputnik акорреспондент иеиҳәеит Ареспубликатә хәышәтәырҭа аҳақьым хада ихаҭыԥуаҩ Асҭана Аҩӡба.
"Ԥсырӡха ақыҭа иахьаҵанакуа иҟалаз амҩатә машәыр ашьҭахь ааҩык ҳара ҳахь иааргеит. Ишьҭаҳҵеит ԥшьҩык, урт рахьтә хҩык аоперациа рзымҩаԥаагеит, уажәы дара аԥсеиқәырхарҭаҿы ишьҭоуп, рҭагылазаашьа уадаҩуп, дара зегьы Аԥсны атәылауаа роуп. Даҽа туристкак лҭагылазаашьа бжьаратәуп", - иҳәеит иара.
Аҩӡба иажәақәа рыла, егьырҭ актәи амедицинатә цхыраара рырҭан, иоурышьҭит.
Гәдоуҭа араион Ԥсырӡха ақыҭа иахьаҵанакуа амашьынақәа ҩба еиҿасит нанҳәа 26-27 руха асааҭ 02:49 рзы. "Мерседеси" "Тоиотеи" анеиҿас, жәҩык апассаџьырцәа аахақәа роуит, урҭ рыбжьара иҟоуп атуристцәагьы аҭыԥантәи ауааԥсырагьы.