АҞӘА, цәыббра 12 – Sputnik, Бадраҟ Аҩӡба. Есышықәсатәи аԥсуа-адыга литературатә фестиваль "Арифмақәа Риҵа" мҩаԥгахоит Аԥсны цәыббра 16-17 рзы ҳәа Sputnik иазеиҭалҳәеит апроект автор, апоет Зарина Ҟаныҟәа.
"Арифмақәа Риҵа"– камертә фестивальуп, хықәкыс иамоуп акультуратә еимадарақәа реиқәырхара, аԥсуеи адыгеи милаҭтә литературақәа рырҿиара", - лҳәеит лара.
Уажәраанӡа афестиваль иалахәын Аԥсни Ҟабарда-Балкариеи. Сынтәа ирҭбаауп агеографиа, афестиваль иаднаԥхьалоит Адыгеиеи Ҟарачы-Черқьесиеи рҟынтәи апоетцәеи ажурналистцәеи.
Афестиваль "Арифмақәа Риҵа-2023" еиҿкаауп Аԥсны акультура аминистрра адгыларала, адыга поет, ашәҟәыҩҩы, аҵарауаҩ Заур Налоев диижьҭеи 95 шықәса аҵра ахьӡала.
Афестиваль аҳәаақәа ирҭагӡаны иазԥхьагәаҭоуп апоетикатә марафон амҩаԥгареи аԥсуа поетцәа ҿарацәа аҳамҭақәа рыҭареи.
Раԥхьатәи афестиваль "Арифмақәа Риҵа" мҩаԥган 2018 шықәсазы. 2020 шықәсазы ковидтә ԥкрақәа ирхырҟьаны имҩаԥган онлаин.