АҞӘА, цәыббра 25 – Sputnik. Акциа "Ԥсра зқәым архәҭа" мҩаԥгахоит цәыббра 30 рзы, абри атәы аанацҳауеит "Аԥсныпресс" амаҵзура.
Акциа аиҿкааҩцәа аибашьра иалахәыз аҳәса-аинвалидцәа Рассоциациа ахантәаҩы Лариса Ҭарбеи аилахәыра "А-Мобаил" ахаҭарнак Асҭанда Ҷкадуаԥҳаи ишазгәарҭаз ала, Аҳәынҭқарратә адрамтеатр аҿаԥхьа акциа алахәылацәа зегьы аҽеизгара иалагоит асааҭ 10:30 рзы, иара уаҟа афотосахьақәа рырҭоит.
Асааҭ 11:00 рзы инеиуеит Ахьӡ-Аԥша апарк ахь ашәҭқәа рышьҭаҵаразы. Анаҩс идәықәлоит апарад ахьымҩаԥысуа Аиааира ашҭахь.
Иахьазы имазеиуп 1100-ҩык афырхацәа рфотосахьақәа. Афотоқәа рықәҭыхра алшоит абри аҭыӡҭыԥ ала: Аҟәа, Абазақәа рымҩа 55.