АҞӘА, цәыббра 27 - Sputnik, Бадраҟ Аҩӡба. Аҟәа, Сергеи Багаԥшь ихьӡ зху ашҭаҿы ашколхәыҷқәа рыбжьара ацәаҳәақәгылатә ашәа аицлабра мҩаԥысит.
Аныҳәатә уснагӡатә алахәылацәа имҩаныргеит аԥсуа бираҟ ду. Иара убасгьы ашҭаҿы иқәыргылан Аџьынџьтәылатә еибашьраан иҭыхыз афотосахьақәа.
Ауснагӡатә еиҿнакааит аҳҭнықалақь ахадара. Абиԥара ҿа рахь ихы нарханы дықәгылеит Аҟәа ахада Беслан Ешба.
"Гәыкала ишәыдысныҳәалар сҭахуп Аԥсны аҳҭнықалақь Аҟәа ахақәиҭтәра 30 шықәса ахыҵра амш. Аветеранцәа ишәзеиҭарҳәахьеит, аҭоурых ала ижәдыруеит ари ажәылара аибашьра аиааираҿы ихадараз акакәны ишыҟалаз", - иҳәеит иара.
Аԥсны ахақәиҭреи ахьыԥшымреи азаазгаз афырхацәа шәара шәзы иҿырԥшыгазароуп ҳәа иҳәеит Ешба.
Ахәыҷқәа идырбан напышьашәалатәи аибашьра аелементқәа.