АҞӘА, цәыббра 30 - Sputnik. Владислав Арӡынба ихьӡ зху Аҟәатәи аҳаирбаӷәаза актәи ареис аднакылоит 2024 шықәса анҵәамҭазы, абри атәы РИА Новости иазеиҭеиҳәеит Аԥсны Ашәарҭадаратә хеилак амаӡаныҟәгаҩ Сергеи Шамба.
"Атендр аҟны урыстәылатәи ахеилак аиааира агеит, уи аҳаирбаӷәаза ашьақәыргылара анапы ианызаауеит. 2024 шықәса анҵәамҭазы актәи ареис аднакылоит", - иҳәеит Шамба.
Убри аан Ашәарҭадаратә хеилак амаӡаныҟәгаҩ иазгәеиҭеит, Аԥсны жәларбжьаратәи акод аиура ишақәымгәыӷуа, аха урыстәылатәи аҳаирхеилакқәа иатәу аҳаирпланқәа ԥырлап ҳәа ргәы ишаанаго.
Аҟәатәи аҳаиртә баӷәаза Бабышара аҳаблаҿы иҟоуп, аҳҭнықалақьи иареи 18 километра рыбжьоуп. Уи ргылан иҳаҩсыз ашәышықәса 60-тәи ашықәсқәа рзы, аус ауан 1993 шықәсанӡа. Аҟәатәи аҳаирбаӷәаза ареконструкциа алагаразы аиқәшаҳаҭра 2023 шықәса рашәара 16 рзы рнапы аҵарҩит, Аԥсны Апарламент аҿы амчра арҭеит ԥхынгәы 26 рзы.
Аинвестициатә проект иазԥхьагәанаҭоит акомплекс зегьы ареконструкциа, аеродром, аеровокзалтә комплекс, ауааи аидарақәеи рымҩангара еиқәзыршәо аобиектқәа. Аеродроми аеровокзалтә комплекси аҳәынҭқарра ишахатәу иаанхоит, аинвестор ихы иаирхәалоит.