АҞӘА, жьҭаара 15 - Sputnik, Бадри Есиава. IV Жәларбжьаратәи атуристтә форум "VISIT АPSNY" аҳәаақәа ирҭагӡаны Аҟәа иаатит афестиваль "Аԥсны агьама".
Афестиваль "Аԥсны агьама" мҩаԥысуеит акультура-усутә ҭыԥ "Гәыма" аҟны.
"Афорум "VISIT АPSNY" ԥшьынтәуп жьҭаара 13 рзы имҩаԥаагоижьҭеи. Жьҭаара 13-15 рзы Аԥсны аҭыԥ ԥшӡарақәа збарҭ зҭахәу рзы аӡыргаратә тур мҩаԥысуеит. Иахьа "Гәыма" аҟны еиҿкаау аԥсуа чыс агьамабаратә фестиваль ҳтәыла абренд шьақәзырӷәӷәо акакәны иҟоуп, "Аԥсны агьама" -есышықәса имҩаԥгахалоит", - лҳәеит "Атуризм аԥснытәи аидгыла" ахада, атуристтә форум "VISIT АPSNY" аиҿкааҩ Анна Калиагина.
Афестиваль "Аԥсны агьама" аҟны еиҿкаауп аҭыԥантәи анаплакҩцәа раалыҵқәа риармарка, аинтерактив-дырратә хәмарра "Амилаҭтә чыс хкқәа рҷыдарақәа", аџьынџьыхәеи, ахәырмарҩеи, ачаи рыҟаҵашьазы амастер-класс, аҩыҟаҵаҩцәа рыҿцәажәара. Асааҭ 19:30 рзы афильм "Аԥсҭазаара агьама" дырбахоит.
IV Жәларбжьаратәи атуристтә форум "VISIT АPSNY" мҩаԥысуеит жьҭаара 15-18 рзы. Арҭ амшқәа рзы еиуеиԥшым азҵаарақәа рыла аиҿцәажәарақәеи астол гьежьқәеи мҩаԥгахоит.