АҞӘА, жьҭаара 20 – Sputnik, Асмаҭ Ҵәыџьԥҳа. Акультура-гәыҳалалратә фонд "Ашана" аԥареизгара иалагеит Шабаҭ Голанӡиа, Левон Папазиан, Александр Каленџьиан ргәабзиара ашьақәыргыларазы.
Ахәыҷқәа ргәабзиара ашьақәыргылара мҩаԥысуеит Аҟәа аиҭашьақәыргыларатә центр "Дар" аҟны.
Ацентр анапхгаҩы Алиас Демерџьиԥа иажәақәа рыла, шықәсык ҵуеит ахәыҷқәа амеханотерапиа акурсқәа рзымҩаԥыргоижьҭеи. Сынтәа аҟазауаа ирзацырҵеит агәыр-рефлексотерапиа. Урҭ ирыбзоураны руаӡәк, Шабаҭ Голанӡиа актәи ишьаҿақәа реихгара илшеит.
"Ҳақәгәыӷуеит егьырҭгьы аныҟәара рылшап ҳәа, избанзар имҩаԥааго аусқәа рылҵшәа аабоит", - ҳәа иҳәеит иара.
Аҳақьым-арефлексотерапевт Валентин Вандышев иҳәеит ишымҩаԥиго анервтә система хада анырра азҭаша, аимпульсқәа зырҿыхаша апроцедурақәа.
"Аус уадаҩуп, аамҭа рацәа аҭахуп, аха убри аан алҵшәақәа шамахамзар иамоуп", - ҳәа иҳәеит иара.
Шабаҭ, Левон, Александр ргәабзиара ашьақәыргылараз еизгатәуп 1 234 000 мааҭ.