АҞӘА, жьҭаара 23 - Sputnik, Асмаҭ Ҵәыџьԥҳа. Аԥсны атәылауаҩык Украина Арбџьармчқәа дыҭҟәаны дрымоуп ҳәа аҳәамҭа ҟаиҵеит Урыстәыла арегион ҿыцқәа рҟны Аԥсны ахада ихаҭарнак ҷыда Лев Кәыҵниа.
Иара иазгәеиҭеит аиҭныԥсахларазы аиҿцәажәарақәа шымҩаԥысуа, аха уи ус ирласны ишалымҵуа.
"Сгәы иаанагоит, ари ахырхарҭаҟны, хымԥада, аус ҳаулоит. Иҳалшо зегь ҟаҳҵалоит, аха аруаагьы акыр рнапы иакуп ари аус аҟны", - иҳәеит Кәыҵниа.
Лев Кәыҵниа иажәа иацҵо иҳәеит зны-зынла убас аҭагылазаашьақәа ҟалалоит иҭахаз Аԥсны атәылауаа рыԥсыбаҩқәа раагара аналымшо, аха еиуеиԥшым аимадарақәа, аиалацәажәарақәа ирыбзоураны уи анҳалшозгьы ыҟан ҳәа.