АҞӘА, жьҭаара 26 – Sputnik. Урыстәыла Афедералтә еизара алахәылацәа Аԥсныҟа баџьда иӡшьартәу агаз алагалараз аԥкаанҵа шьақәдырӷәӷәеит ҳәа аанацҳауеит РИА Новости.
"Афедералтә закәан адкылара Урыстәылатәи Афедерациа аинтересқәа ирықәшәоит, аурыс-аԥсуа еизыҟазаашьақәа рырӷәӷәара иацхраауеит", - ҳәа аҳәоит ашәҟәы.
Аԥкаанҵа ашьақәырӷәӷәара азҵаара иахәаԥшит Аԥсны Апарламент жәларбжьаратәи, апарламентбжьаратәи еимадарақәеи аџьынџьуаа реимадарақәеи рзы аилак аҟны аилак ахантәаҩы, адепутат Алхас Барцыц инапхгарала. Анаҩс азакәан апроект адепутатцәа ирыдгалахоит.
Атауарқәа рыла аилахәҳаахәҭраз Аԥсни Урыстәылеи рыбжьара аиқәшаҳаҭра иацҵо Аԥкаанҵа Аекономика аминистрра адгалара анаҭеит, Адәныҟатәи аусқәа рминистрра ақәшаҳаҭрала. Уаанӡа уи Аҳәынҭдума ишьақәнырӷәӷәахьан.
Аамҭалатәи аԥкаанҵа жәамш рыҩнуҵҟа ахархәара арҭоит, амчра аиуеит иахәҭоу аҳәынҭқарраҩнуҵҟатәи ауснагӡатәқәа шынарыгӡаз азы адырра аныҟалалак ашьҭахь.
"Аԥкаанҵа аамҭала ахархәара азԥхьагәаҭоуп аӡшьартә газ зыда ԥсыхәа ыҟам атауарқәа иахьрыҵанакуа. "Убри аан Аԥсны афымцамч адифицит аҟазаараан арахь иаагатәуп 2 000 тонна ашықәс аҩнуҵҟа", - ҳәа аҳәоит апроект иацу аилыркаага.