АҞӘА, абҵара 2 - Sputnik. Аҭагылазаашьа ҷыдақәа раԥыхреи, агәҽанызаара рыҭареи азҵаарақәа рыла русеицуразы еилацәажәеит Аԥсны АҶ рминистр Лев Кәыҵниеи Урыстәыла АҶА аусбарҭа хада Краснодартәи атәылаҿацә ахада ин.н. Николаи Платонихин. Абри атәы аанацҳауеит аусбарҭа апресс-маҵзура.
"Ҳҿапхьа иқәгылоу адҵақәа иреиуоуп- ҳусеицура аҳәаақәҵареи, аиқәырхаҩцәа разыҟаҵараҿы ҳԥышәеимдареи, аҭагылазаашьа ҷыдақәа раԥыхразы еицаҳзеиԥшу аҽазыҟаҵарақәа рымҩаԥгареи роуп", - иҳәеит Платонихин.
Платонихи иажәақәа рыла, Урыстәыла АҶА анапхгара ҳтәылақәа русеицура ихадароу зҵаараны иахәаԥшуеит.
Лев Кәыҵниа иазгәеиҭеит, аҩ-тәылак реиқәырхаратә усбарҭақәа русеицура аамҭақәа ишԥыршәахьоу, уи аҿиара атәылақәа рҭахрақәа ишрықәшәо.
Аганқәа иазгәарҭеит еицырзеиԥшу аҽазыҟаҵарақәа рымҩаԥгара шхымԥадатәиу. Аусутә гәыԥ аԥҵаразы аӡбра рыдыркылеит, уи ҩымчыбжь иалагӡаны аусеицуразы аплан еиқәнаршәоит.