АҞӘА, абҵара 2 - Sputnik. Аԥсны Апарламент аҩбатәи аҵыхәтәантәи аԥхьарала ишьақәнырӷәӷәеит Аԥсни Урыстәылеи ирыбжьоу атауарқәа рыла ахәаахәҭразы аиҳабырабжьаратә еиқәшаҳаҭра иалагалаз аԥсахрақәа.
Аԥкаанҵаҟны Урыстәылантәи Аԥсныҟа баџьда иаарго атауарқәа рсиа иарбоуп иӡшьартәу агаз.
Аԥсны афинансқәа рминистрра иҟанаҵаз алкаақәа рыла, адокумент аус аруразы ареспубликатә биуџьет аҟынтәи ахарџьцҵақәа аҭаххом.
Атауарқәа рыла аилахәҳаахәҭраз Аԥсни Урыстәылеи ирыбжьоу Аԥкаанҵа рыдыргалеит Аенергетика аминистрра Урыстәыла Адәныҟатәи аусқәа рминистрра ақәшаҳаҭрала.
Аамҭалатәи аԥкаанҵа жәамш рыҩнуҵҟа аахархәара арҭоит, амчра аиуоит иахәҭоу аҳәынҭқарра ҩнуҵҟатәи ауснагӡатәқәа шынарыгӡаз азы адырра аныҟалак ашьҭахь.
"Аамҭалатәи аԥкаанҵа ахархәара арҭоит, избанзар апропан ихымԥадатәиу атауарқәа ирхыԥхьаӡалоуп. Аԥсны афымцамч азымхара иахҟьаны Урыстәылантәи ҳреспубликахь шықәсык иалагӡаны ҩ-нызқь тонна иӡшьартәу агаз ааргоит", - азгәаҭоуп азакәан апроект аилкаанҵаҟны.