АҞӘА, абҵара 3 - Sputnik. Аԥсны азинхьчаратә усбараҭқәа 2023 шықәса аҩнуҵҟа ԥшь-кьылак инареиҳаны анаркотикқәа, апсихотроптә хархәагақәа рылыргахьеит, абри атәы "Апсны.Иахьа" иазеиҭеиҳәеит Аԥсны Аҩнуҵҟатәи аусқәа рминистрра анаркотикқәа реикәыршара ахылаԥшразы аусбараҭа аиҳабы Асҭамыр Ԥачалиа.
"2023 шықәсазы закәаншьаҭада атәыла иаларгалоз 4,12 кьыла анаркотикатә хархәагақәеи, апсихотроптә маҭәашьарқәеи, урҭ ирышьашәало амаҭәашьарқәеи рылгоуп. Урҭ рҟынтәи 1,9 кьыла метадонуп", - иҳәеит иара.
Ԥачалиа иҳәеит анаркотикқәа Аԥсныҟа иаларгалоит урыстәылантәи ҳәа, Егрытәи аҳәаала асеиԥш згәаҭара ыҟамызт.
Аԥсны Аҩнуҵҟатәи аусқәа рминистрра анаркотикқәа реикәыршара ахылаԥшразы аусбараҭа аиҳабы иажәақәа рыла, ашықәс иалагазар закәаншьаҭада анаркотикқәа реикәыршаразы 154 цәгьоура аарԥшуп. Аиҳарак анаркотикқәа аазгои иалазырҵәои аҳәаанырцәуаа роуп.
2023 шықәса аҩнуҵҟа закәаншьаҭада анаркотикқәа реикәыршаразы иаанкылоуп 37 хаҿы. Урҭ рҟынтәи 12-ҩык урыстәылаа роуп, 11-ҩык – Узбекистан атәылауаа, быжьҩык – Аԥсны атәылауаа, хҩык – Таџьикистан атәылауаа, ҩыџьа- Туркменистан, ҩыџьа- Азербаиџьан.