АҞӘА, абҵара 4 – Sputnik. Хәыда-ԥсада аԥсуа бызшәа аҵаразы амобилтә хархәага азырхиоуп ҳәа аанацҳауеит Аԥсны аҵара аминистрра апресс-маҵзура.
Аусбарҭаҿ ишазгәарҭаз ала, амобилтә хархәага еиқәыршәоуп аԥсуа бызшәа аизырҳараз Баграт Шьынқәба ихьӡ зху Агәыҳалалратә фонд аексперт-методистцәеи Capital School Center-и алархәны Москватәи аԥсуа диаспора ацхыраарала.
Раԥхьатәи ахархәага MyJo аплатформаҿ ахәыҷқәеи адуцәеи алшара рнаҭоит аԥсуа бызшәала ацәажәара ашьцылара, аԥхьара, иуаҳауа аилкаара, ииашаны аҩра.
Иара еиқәдыршәеит Вахтанг Ҭыжәба инапхгарала, Москватәи аԥсуа диаспора аусбарҭа алахәылацәа.
"Апроект ахықәкы хада - аԥсуа бызшәа зҵар зҭаху зегь рзы арманшәалара, иара убас ҳхатәы бызшәа аӡыргара", - ҳәа иҳәеит Ҭыжәба.
Амобилтә хархәага MyJo ыҟоуп AppStore, GooglePlay рыҟны - азхьарԥш изҭаху шәзын.