АҞӘА, абҵара 6 - Sputnik. Аԥсны аԥыза-министр Александр Анқәаб Аԥсуа телехәаԥшра 45 шықәса ахыҵра амшныҳәа рыдиныҳәалеит аусзуҩцәа. Абри атәы аанацҳауеит аминистрцәа реилазаара апресс-маҵзура.
Александр Анқәаб адныҳәалараҿы иазгәеиҭеит 1978 шықәса абҵарамза 6 - ҳажәлар рҭоурых аҿы акрызҵазкуа арыцхә шакәу.
Аԥыза-министр иазгәеиҭеит аибашьра ашьҭахь аамҭа хьанҭақәа раан Аԥсуа телехәаԥшра аусзуҩцәа гәкамыжьрада рыжәлар рымаҵ шыруз.
Аиҳабыратә биԥара иаҵанакуа ателехәаԥшра аусзуҩцәа рԥышәа, рдырра рымардоит аҿарацәа, иҳәеит Анқәаб.
Абҵара 6 1978 шықәсазы Аԥсуа телехәаԥшра аԥсышәала ицәажәаз раԥхьатәи адырраҭарала аефир ахь ицәырҵит. Уинахыс амилаҭтә телехәаԥшра ашьақәгылареи аҿиареи рымҩа ианылеит.