АҞӘА, ԥхынҷкәын 22 - Sputnik, Асмаҭ Ҵәыџьԥҳа. Амузыкатә проект "Apsny-Star" афинал мҩаԥысит аҳәынҭфилармониаҿы ахәаша, ԥхынҷкәын 22 рзы.
Ильда Қәычбериаԥҳа лкоманда алахәыла Лола Колбаиаԥҳа аҵара лҵоит Гнесинаа рыхьӡ зху Амузыка академиаҟны.
Ильда Қәычбериаԥҳа лкоманда аҟынтәи апроект афинал ахь инеит Иракли Џьумутиа, Миранда Мархолиа, Самвел Миракиан. Фаиа Мархолиа лҟынтәи -Софиа Миаукина, Викториа Лабиа, Сариа Аиба, Аслан Шьакаиа.
Софиа Миаукина апроект апродиусер Ҭеимураз Кәакәасқьыр иҟынтәи ҳамҭас илоут-аклип аҭыхразы алшара. Миранда Мархолиа- амузыкатә продиусер Анри Гәынба иҿы ашәа ҭалыҩуеит, Викториа Лабиа-лхатәы альбом аҭаҩразы алшара лымоуп.
Апроект аинформациатә партниор Sputnik Аԥсны ахьӡала Софиа Миаукина афотоҭыхыҩ Наала Аҩӡба лҟны афоҭыхразы аҳамҭа лоуит. Аспонсор хада– амобилтә еимадара "Аҟәафон" ахьӡала Иракли Џьумутиа макбук ианаршьеит.
Апроект "Аpsny-Star" еиҿкаауп Аԥсны Акультура аминистрра адгыларала, аспонсор хада– амобилтә еимадара "Аҟәафон". Sputnik Аԥсны – аинформациатә партниор.